ށ. ފޯކައިދޫ އަށް އުފަން މުޙައްމަދު ޝަރީފް އަކީ އަބަދުވެސް ފޯކައިދޫ އަށް ރީތި ނަން ހޯދައިދޭ ދަރިއެކެވެ. އުމުރުން ވަރަށް ޅަޒުވާންކަންމަތީ ކީރިތި ޤުރުއާން ހިތުދަސްކުރެއްވިއެވެ. އެއަށް ފަހު ރާއްޖޭގެ އެތަކެއް ދަރީންނަކަށް ތަޖުވީދުގެ މަގުން ރީތިކޮށް ޤުރުއާން ކިޔަވަން ދަސްކޮށްދެއްވި ޢުސްތާޛެކެވެ. އަދި މިހާރު ވެސް ޤުރާން ކިޔަވައިދެއްވަމުން ގެންދަވާ ޢެދުރެކެވެ.
ޝަރީފް އަކީ ކުޅިވަރުގެ ރޮނގުން ވެސް ޤައުމީ ފެންވަރުގައި ފާހަގަކޮށްލެވޭ ފަރާތެކެވެ. އެގޮތުން ކްރިކެޓް އާއި ބިލިއާޑް ގައި އޭނާ އަކީ މިހާރު ދިވެހިރާއްޖޭގައި ގުނާލެވޭ ބޮޑު ނަމެކޭ ދެންނެވުމަކީ ކުށަކަށް ނުވާނެއެވެ. އަދި މީގެ އިތުރުން ޝަރީފް އަކީ ޒުވާނުންގެ ޙަރަކާތްތަކުގައި ބައިވެރިވާ ޒުވާނުންނާއި ގުޅޭ ހިތްހެޔޮ މީހެކެވެ.
މޯލްޑިވްސް ސްޕޯޓްސް އެވޯޑްސް 2023 ގައި ރާއްޖޭގެ އެންމެ ފާހަގަކޮށްލެވޭ ފިރިހެން ބިލިއާޑް ކުޅުންތެރިޔާގެ ޝަރަފު ޙާޞިލްކުރައްވާފައި ވާތީ ޢުސްތާޛް ޒަކީ އާއި މުޅި ފޯކައިދޫގެ ނަމުގައި ވަރަށް އިޚްލާޞްތެރިކަމާއި އެކު މަރްޙަބާ ދަންނަވަމެވެ.
