ކޮންމެ މީހެއްގެ ޙަޔާތުގައި ވެސް އެމީހެއްގެ އަމިއްލަ މަސްލަޙަތުގެ ކުރިއަށް މުޖުތަމަޢުގެ މަސްލަޙަތު އިސްކުރަން ޖެހޭ ޙައްސާސް ދަނޑިވަޅުތަކެއް އަންނާނެއެވެ. މިއީ އެފަދަ މުހިންމު ދަނޑިވަޅެއްކަން ޔަޤީނެވެ. ތަފާތު އެތަކެއް ވެރިކަންތަކުގައި އިހުމާލުވެފައި އޮތް، ލޯބިވާ އުފަން މަގޭ ފޯކައިދޫގެ ތަރައްޤީ، އިޙްސާސްކުރަނިވި ޙިއްސުތަކަށް އައިބުކަމެއް ނެތް މިންވަރަށް ކުލަ އަލިވެ، ބިސްބުރެއް ފަދަ ހިތްގައިމު ރަށުގެ މަލަމަތި މިވަނީ ބަދަލުވެފައެވެ. ރަށުގެ ކުދި ބޮޑު އެންމެހާ ރައްޔިތުން (ރުހޭމީހާ އާއި ނުރުހޭމީހާ) ވެސް ޝާމިލުވާގޮތުން އެގެންދަވަނީ އުފާ ފާޅުކުރައްވަމުންނެވެ. އަރާފޭބުމަކީ ބިރުވެރިކަމެއްގެ ގޮތުގައި އޮތް ގާމަތީ ރަށުގެ ހަރުއާނުކަނޑާ ޒަމާނީފެންވަރުގެ ބަނދަރެއް ތަރައްޤީކުރެވި، ދިރިއުޅުމަށް ކޮންމެހެން ބޭނުންވާ މުހިންމު ޚިދުމަތްތައް؛ ފެނާ ނަރުދަމާ އަދި ކަރަންޓު އެވަނީ ލާބަވަނިވި ގޮތެއްގައި ޤާއިމްކުރެވިފައެވެ.
ތަޢުލީމީ ދާއިރާގައި 25 އަހަރު ހޭދަކުރި މީހެއްގެ ޙައިސިއްޔަތުން މިއަދު އުފާވަނީ އުންމީދު ވެސް ނުކުރާހާ ރީތި ބޮޑު އަދި އެހާމެ ޒަމާނީ ސްކޫލެއް ލިބުނީތީ ކިޔަވާކުދިންނާއި އެކުދިންގެ ބެލެނިވެރިން އުފަލުން ފޮޅިފައި ތިބޭތަން ފެންނާތީއެވެ. ޢިޖްތިމާޢީ ޙަރަކާތްތަކާއި، ކުޅިވަރާއި ކަޝްރަތާއި، އުފެއްދުންތެރި ފަންނުވެރިކަން ދިރުވާ އާލާކުރުމަށް ނުހަނު ފުރިހަމަ ޢިޖްތިމާޢީ މަރުކަޒެއް ލިބުނީތީ ޅަޒުވާނުން އުފަލުން އުޅޭތަން ފެންނާތީއެވެ. ސިއްޙީ ޚިދުމަތުގެ ފެންވަރު ރަގަޅުވެ ބަލިމީހުންނާއި. އިސްރަށްވެހިން ހިތްހަމަޖެހިފައި ތިބޭތީއެވެ. މިހުރިހާ ތަރައްޤީ އާއި ކުރިއެރުންތަކެއް ލިބިފައި ވަނީ ހަމަ ޔަޤީނުން ވެސް ފޯކައިދޫ ދެކެ ނުހަނު ލޯބިވީ ހެޔޮލަފާ ދަރިއެއްގެ މިންނެތް މަސައްކަތުންނެވެ. ފޯކައިދޫގެ ރައްޔިތުންނަށް އުފާވެރި މުސްތަޤުބަލެއް ހޯއްދަވައިދެއްވުމަށްޓަކައި ބަލިއެނދުގައި ވެސް ހަމަ އެންމެކަމެއް ވެސް ވައްޓައިނުލައްވާ އެންމެ ފަހު ނޭވާ އާ ހަމައަށް ވެސް މަސައްކަތް ކޮށްދެއްވި ނަމޫނާ ޚިދުމަތްތެރި ޚާދިމެއްގެ ޤުރުބާނީތަކެއްގެ ސަބަބުންނެވެ. އެބޭފުޅަކީ ށ. ފޯކައިދޫ ހުވަނދުމާގޭ އަލްމަރްޙޫމް ހުސެން ވަހީދުއެވެ. މިއަދުވެސް އެބޭފުޅަކު ދުނިޔޭގައި ނެތްކަމުގެ ފަޅުކަމާ ހިތްދަތިކަން އިޙްސާސްކުރަމުން ހުސެންބެ ކުރެއްވި މަސައްކަތްތަކުގައި ފުރިހަމަނުވާ ކުޑަ ނަމަވެސް ކަމެއް އޮތް ނަމަ، އެކަމެއް ފުރިހަމަ ކުރުމަށް އުޅޭ ބަޔަކަށް މަދަދުވެރިވުމަށް ޢަޒުމް ކަނޑައަޅަމެވެ. މާތް ﷲ ޞުބްޙާނަހޫ ވަތަޢާލާގެ ހެޔޮ ރަޙްމަތްފުޅުން މަރްޙޫމް ހުސެން ވަހީދު (ހުސެންބެ)ގެ ފުރާނަފުޅަށް ސުވަރުގޭގެ މަތިވެރިވެގެންވާ ނިޢުމަތާ ދާއިމީ ހިޔާވަހިކަން މިންވަރުކުރައްވާށިއެވެ. އަދި މިހުރިހާކަމެއްގެ ހެޔޮ ޖަޒާ ދެއްވާށިއެވެ. އާމީން!
