ޒެކްގެ ޙަޔާތުގެ ވަރަށް ޗާރާކީދުވަސްވަރެއް ފެށުނީއެވެ. ހިނިތުންވުމާއި އުފާވެރިކަން ތަންމިނަށްފޮޅިފައި ހުންނަނީ ފަރިކަމަނާއާއި އެކު އެއްއޮފީހެއްގައި ވަޒީފާއަދާކުރުމުގެ އިތުރުން މޮޅ އެދުރަކަށް ވުމާއި ދާދިގާތަށް ދެވޭކަމުގެ ފޮނި ހުވަފެންތަކާ ވެސް އެކުގައެވެ. މުޅިއޮފީހަށް ދެމީހުންގެ ގާތްގުޅުން ފާހަގަކުރެވި، ހަސަދަވެރިކަމުގެ އަސަރެއް ނުވަތަ އެސްފީނާއެއް ވެސް ޖެހިދާނެތީ ފިކުރުބޮޑުވާ މިންވަރަކަށެވެ. ޓިއުޝަންކިލާހުގެ ޚަބަރުތައް މާލެތެރޭގައި ވެސް ފެތުރިއްޖެކަހަލައެވެ. ޕުރައިވެޓުކޮށް ޓިއުޝަން ނަގައިދޭތޯ ގުޅާ ކުދިންނާއި ބެލެނިވެރިން ވެސް ބޮޑުތަނުން އިތުރުވިއެވެ. ހުކުރެއް ހޮނިހިރެއް، ބަންދެއް ނުބަލައި، ގޭގެއަށް ގޮސް ޓިއުޝަންދެމުން ގެންދިޔައެވެ. ލިބޭ އާމްދަނީ އިތުރުވަމުންދިޔައީ ފަތުއަޑުކިޔާފައެވެ. މަދު ހާސްކޮޅަކުން އެތައް ގިނަ ހާސް ރުފިޔާއަށް މައްޗަށް އަރައިގެންދިޔައެވެ.
އަނެއްކާވެސް އުފާވެރިކަމުގެހާރަށް އައުބޮޅެއް އިތުރުވެއްޖެއެވެ. މާލޭގެ އެންމެބޮޑު އެއް ޕުރައިވެޓް ސްކޫލުން ވެސް މުދައްރިސްކަމުގެ ވަޒީފައި ލިބިއްޖެއެވެ. އެ ސްކޫލުގެ ގުރޭޑް ނުވައެއްގެ ނުވަ ކުލާހަކަށް އެކައުންޓިންގ ކިޔަވައިދެމުން، ޓިއުޝަންކިލާހުގެ ހުރިހާ ގުރޭޑަކަށް އިކޮނޮމިކްސް ކިޔަވައިދެމުން، މުދައްރިސުންގެ މަރުކަޒުގައި އިދާރީ ވަޒީފާ އަދާކުރަމުން، އަދި އިތުރު ފަންސަވީސް ދަރިވަރަކަށް ގޭގެއަށްގޮސް ކިޔަވައިދޭންފެށިއެވެ. މުޅިޙަޔާތަށް އެކިގޮތްގޮތުން ހިޔަނިއެޅެމުންދިޔަހައި ހިތްދަތި ދުވަސްތަކެއް މަޒީވެއްޖެއެވެ. މާލީގޮތުން ފުދުންތެރިކަން އިތުރުވުމާއި ބޭންކުގައި ފައިސާ ފަހަށް ރައްކައުރެވެންފެށުނެވެ. އަދި ޚުދު ފަރިކަމަނާއަށް ވެސް ވަގުތު ދެވޭމިންވަރު ބޮޑުތަނުން ކުޑަވެއްޖެއެވެ. އޮފީސް ގަޑީގައި ނޫންގޮތަކަށް ބައްދަލުކުރަން ވަގުތުނުދެވޭތީ، ހުކުރުދުވަހުގެ ރޭގަނޑުގައި އިތުރުގަޑީގައި މަސައްކަތްކުރުމަށް ވެސް ޒަމްކޮ ގުޅުއްވާނެތެވެ.
ވަގުތަކީ އެއްރެއެއްގެ ކިލާސް ނިމުނު ވަގުތެވެ. ޓިއުޝަންކިލާހުގެ އިސްވެރިޔާ އާއި ބައްދަލުކުރުމަށް ދަޢުވަތެއް ލިބިއްޖެއެވެ. މިބައްދަލުކުރެއްވުން އޮތީ އެއްވެސް ނޫސްވެރިޔަކަށް ނުވަދެވޭގޮތަށް ސިއްރުކުރެވިފައި ކަހަލައެވެ. ކޮންފަދަ ހިތްގައިމު ވަގުތުކޮޅެއް ހެއްޔެވެ. އަޅުގަޑުގެ މަސައްކަތަކަށް ތަޢުރީފުކުރުމުގެ ޙަފުލާއެކެވެ. ގުނާ ޢަދަދު ނުކުރެވޭހާ ގިނަ ވާހަކަ ކިޔައިދެއްވި އެޙަފުލާއޮތީ މަޝްހޫރު ބަލަކުޝާންކެފޭގައެވެ. ވަރަށްވެސް ހަރުކަށި އުޞޫލުތަކަށް ލޯބިކުރައްވައި ބޭފުޅެއްކަމުގައި ވިޔަސް ވަޢުދެއް ވެއްޖެނަމަ އެވަޢުދެއް ފުއްދަވާނެކަމުގެ ފުރިހަމަޔަޤީންކަން ލިބިއްޖެއެވެ. ކުރިން ހަމަ ވިދާޅުވިގޮތަށް މުސާރަ ބޮޑުކޮށްދެއްވައި، ވެރިޔާގެ ޚާއްޞަ އެކައުންޓެއްގެ ދަށުން ހުރިހާވަގުތެއްގައި ވެސް ކެއުންބުއިން މުޅިންހިލޭ ލިބޭނެ އިންތިޒާމް ހަމަޖައްސަވައިދެއްވިއެވެ. މިއީ ޒެކް އަށް ފެންނަ ހުވަފެނެއް ފަދައިންނެވެ. މިހުރިހާކަމެއް ވެސް ފެންނަމުން ސީދާވަމުންދަނީއެވެ. އެއްކަމަށް ފަހު އަނެއްކަމެއް ތަދުބީރުކުރެވިފައި ވާ ފަދައިންނެވެ. ރާއްޖެތެރެއިން މާލެ އަށް ޙިޖުރަކޮށްގެން އުޅޭ މީހަކަށް މިލިބުނީވެސް ކިހާ ބޮޑު ނިޢުމަތެއް ހެއްޔެވެ. ހަވީރުގެ ސައި ގަޑިއަށް ވެސް ބިސްފަރާޓާ އާއި ބަޖިޔާ އާއި ކިރުސައި ބޭނުންވަރަކަށް ލިބެންފެށިއެވެ. މާލެގައި ހުރުރުމާއި ކެޔުންވެސް މުޅިންހިލޭވީއެވެ. ކުރަންޖެހޭ ޚަރަދުތައް ކުޑަވުމުގެ އިތުރުން އާމްދަނީ ބޮޑުތަނުން އިތުރުވެއްޖެއެވެ. އަދި ފަހަށް ރައްކައުކުރުމުގެ ނިސްބަތް ވެސް ބޮޑުތަނުން އިތުރުވެއްޖެއެވެ. މިހާރުދެން ކުރަންޖެހޭ ޚަރަދަކީ ކޮންމެ ތިންމަހަކުން އެއްމަހު ބައިސްކަލެއް ގަތުމަށް ކުރަންޖެހޭޚަރަދެވެ. އަބަދުވެސް ދުއްވާ ހިތްވަނީ ހުދުކުލައިގެ ރެލީޝޮޕަރު އަންހެން ބައިސްކަލެވެ. އެއީ ޒުވާން ފުރާވަރު ކުދިންނަށް ވަރަށް ރީތިވެފައި މަޝްހޫރު ބައިސްކަލަކަށް ވުމުން ވަރަށް އަވަސް އަވަހަށް ވަގަށްނަގައެވެ. އެހެންނަމަވެސް، އެއްބައިސްކަލު ހަމަގެއްލުމާއި އެކު އަނެއްބައިސްކަލު ގަންނަމުން ދިޔައެވެ. މާލޭގައި ހިނގާފައި ފައިމަގުގައި އުޅުމަކީ ވަރަށްވެސް އުނދަގޫކަމެކެވެ. އަދި ވަކިން ޚާއްޞަކޮށް ގޭގެއަށް ގޮސް ޓިއުޝަންދޭ މީހަކަށް ވަރަށް ދަތިވާނެކަމެކެވެ. މުޅިމާލޭގައި ވެސް ނަންހިނގާ އިކޯންސާރ އަކަށް އަދި ވަކިން ބޮޑަށް އުނދަގޫ ވާނެތާއެވެ. ހުނަރުވެރި މޮޅު އެދުރަކަށް ވުމަށް ކުރި އުންމީދުތައް އެތައް ގުނައަކަށް އިތުރުވެއްޖެއެވެ.
މިހުރިހާ އުފާވެރިކަމެއް އެއްފަހަރާ ލިބުނީމާ ފަރިކަމަނާ އާއި ޙިއްޞާނުކޮށް ލޮލަށް ނިދިފިޔެއް އަންނާނެތޯއެވެ. އެހެންކަމުން ފަރިކަމަނާއަށް ގުޅާލީ ލަދުންހުރެ ތަދެއްނުފިލާނެކަމަށް ބަލައިގެންނެވެ. އަސްތާ ވާހަކަަތައް އަޑުއަހާކަށް ފޯނެއް ވެސް ކަމަކުނުދިޔައެވެ. ބައްދަލުކޮށްލަން ގަނޑުވަރުދޮށަށް އައުމަށް ދަޢުވަތު ދީފިއެވެ. އަހާލުމުގެ ކުރިންވެސް ގަނޑުވަރުތެރޭ ބޭފުޅުން އަވަހާރަފުޅުލައްޕަވައިފިކަމަށާއި، އިންތިޒާރުގައި ގަނޑުވަރުގެ ދޮރޯށިކޮޅުގައި މަޑުކުރައްވާނެކަމަށް ވިދާޅުވިއެވެ. ވަރަށް އުފަލުންހުރެ ބޮޑު ބިސްފަރާޓާއެއް ޓިޝޫކަރުދާހެއްގައި އޮޅާލުމަށްފަހު، ބާޒާރުކޮތަޅަކަށް ލައިގެން ބައިސްކަލުގެ ހުންގާނުގައި އަޅުވާލައިގެންހުރެ ގަނޑުވަރަށް މިސްރާބުޖެހިއެވެ. ބިސްފަރާޓާ އަކީ ޒެކް އަށް ވަރަށް މީރު އެއްޗެކެވެ. އެގޮތުން ޒެކްއަށް މީރުކޮންމެ އެއްޗެއްގެ ރަހަވެސް ޒަމްކޮއަށް ދޭހިތްވާތީއެވެ. ކުއްލިއަކަށް ދެލޯމެރުނު ކަހަލައެވެ. ކުރުސޯޓަކާއި އަތްކުރު ހުދު ޓީޝާޓެއްގައި އެހުރީ ފަރިކަމަނާއެވެ. ރާބޮންޖެއް ފަދަ ދިގު ދޮން ދެފައިކޮޅު ފެނުނު ވަގުތު ލަދުންމަރުވެއްޖެއެވެ. ހަނދުވަރުގެ އަލިކަމުގެ ތެރޭގައި ހިނިތުންވެފައި ހުންނައިރު ފަރިކަމަނާއަށް ނުބެލޭނީ ފަހެ ކާކަށްހެއްޔެވެ. ރާއްޖެތެރޭ ކުދިންނާއި މާލޭކުދިން ހާދަ ތަފާތޭ ހިތަށްއެރިއެވެ. އެހެން ނަމަވެސް ޒެކްއަށް މާގިނަވަގުތެއް ވެސް ނެތެވެ. ކޮންމެރެއެއްގެ ވެސް ބާރަ ޖެހުމުގެ ކުރިންގެޔަށް ވަންނަންޖެހެއެވެ. ވީމާ ކުޑަވަގުތުކޮޅަކު ވާހަކަދައްކާލައި މަޖާކޮށްލުމަށް ފަހު ބިސްފަރާޓާ ވެސް ހަދިޔާކުރީމެވެ. އުފަލުންހުރެ ހަދިޔާ ޤަބޫލުކުރުމަށް ފަހު އައު ގޮތަކަށް ވަދާޢީ ސަލާމްކޮށްލިއެވެ.
ޢާއްމުކޮށް ނިދާ ވަގުތަށް ވުރެން ވެސް ތަންކޮޅެއް ލަސްވެއްޖެއެވެ. ނަމަވެސް ” ލޮލަކަށް ނިންޖެއް ނާދޭ، މިހިތަށް ވާވަރު ނޭނގޭ، ހީވޭ ހިތް ބުނާހެން ލަސް ލަހުން، މޫނޭ ތިޔަ ނޫން ފެންނާކަށް ނޭދެމޭ ” ހަމަ ފިކުރުތައް ގިނަ ވަނީއެވެ. އިންތިޒާރުކުރާ ކަމަކަށް ނިމުމެއް އަންނާނެގޮތެއް ނުވާތީ، ފިކުރު ބޮޑުވަނީއެވެ. އެހެންނަވެސް މަޑުކުރަން ބުނެފައި އޮތް ދެއަހަރުދުވަހުގެ މުއްދަތު ވެސް ހަމައެއްނުވެއެވެ. ދިގު އިންތިޒާރުގެ މޭވާ ފޮނިވާނެތާއެވެ. އަދި އޭނާ ޒެކް އަށް އާން ބަސް ބުނާނެތާއެވެ. އިންތިޒާރުގައި އެންމެހިތްދަތި ކަމަކީ ގުޅާލުންވެސް ހުއްދަކަމަކަށް ނުވާތީއެވެ. އިންތިޒާރު ކުރުމުގެ އިމްތިޙާނަށް ފޮނުވާލީ ވަރުގަދަ އިންޒާރަކާއި ވެސް އެކުގައެވެ. ހަތަރު އަހަރު ހުރެގެން ވެސް އޭނާ ހޯދުމަށެވެ. ފަހެ، ކެތްތެރިންނާއި އެކު މާތް ﷲ ވޮޑިގެންވެއެވެ.
އާދައިގެމަތިން އިރުފެނުޖެހޭނީ ޓިއުޝަން ކިލާސްއަށް ދާން ތައްޔާރުވުމުގެ ތެރޭގައެވެ. ތިންވަޒީފާގެ ވެރިއެއްގެ ގޮތުގައި ވަރަށް ހިތްހަމަޖެހިފައި ވިއެވެ. މިހާރުދެން ދޭދޭ ޓީޗަރުންގެ މެދުގައި ވެސް އަދި ދަރިވަރުންގެ މެދުގައި ވެސް ޒެކް ސާރ އަކީ ފިސާރި ނަން ހިނގާ އެދުރެކެވެ. އަދި ކިޔަވައިދޭން ނުދާ ކިލާސްތަކުގެ ދަރިވަރުންނަށް ވެސް ޒެކް ސާރ ވަރަށް ފަރިތަވެއްޖެއެވެ. އަދި ކުޑަ ދުވަސްކޮޅެއްގެ ތެރޭގައި ގުރޭޑު ދިހައެއްވެސް ޙަވާލުކޮށްފިއެވެ. އެއީ ވަރަށް ވެސް ބޮޑު މަސްޢޫލިއްޔަތެކެވެ. އެއީ ލަންޑަން ޖީސީއީ އޯލެވެލް އިމްތިޙާންގައި ދަރިވަރުންނަށް ރަގަޅު ނަތީޖާއެއް ނުލިބިއްޖެނަމަ، ޓިއުޝަން ކިލާސް އާއި ކިޔަވައިދޭ މުދައްރިސް ވެސް ފަޟީޙަތްވާނެތެވެ. އަދި ބެލެނިވެރިންގެ ނުރުހުންލިބި، ދަރިވަރުން އެހެން ޓިއުޝަން ކިލާސްތަކަށް ބަދަލުކުރާނެތީ އާއި އޭގެސަބަބުން ވިޔަފާރިއަށް ގެއްލުންވާނެތީއެވެ. އެއްދުވަހެއްގައި ކުލާހެއްގައި ޝައުޤުވެރި ފިލާވަޅެއްގައި ގެއްލި ހުސްވެފައި ހުއްޓައި ކުއްލިއަކަށް ނޭވާ ހާސްކޮށްލިއެވެ. އަސްތާ ކަމަކުދާކަށެއް ނެތެވެ. ސިފައިންގެ ދެބޭކަލުންނާއި އެކު ބޮޑު ސާރ ކިލާސް ކުރިމައްޗަށް ހުއްޓާލިއެވެ. އަދި އެބޭކަލުންނާއި އެކު ސިފައިންގެއަށް ދިއުމަށް އަންގައިފިއެވެ. ސިފައިންނަށް އެއްބާރުލުން ދެއްވުމަށާއި، އިއުތިރާޒުކޮށް ދެކޮޅުހަދައިފި ނަމަ، ބިޑި އަޅުވާނެކަމުގެ އިންޒާރު ވެސ ދިނެވެ. ޒެކް ހުރީ ވީގޮތެއް، ކުރެވުނުކުށެއް ވެސް ނޭނގި ބަސްހުއްޓިފައެވެ. ކިލާހުން ބޭރަށް ނިކުތްތަނުން ސިފައިންގެ ޖިޕަކަށް އަރުވައިގެން ގެންގޮސްފޫއެވެ. (ނުނިމޭ…)
