ކުރިއަށް އޮތް ރައްޔިތުންގެ މަޖިލިސްގެ ކެމްޕެއިންގައި އެންމެ ގިނައިން އިވޭ އެކައްޗަކީ ތަރައްޤީ ލިބޭނީ ސަރުކާރު ތަމްސީލްކުރާ ކެންޑިޑޭޓް ހޮވައިގެން ކަމަށް ބުނާ ބުނުމެވެ. ބައެއް މީހުން ވަކާލާތުކުރާ ގޮތުގައި އިދިކޮޅު ކެންޑިޑޭޓެއް މަޖިލިސް އިންތިޚާބު ކާމިޔާބު ކޮށްފި ނަމަ 5 އަހަރު ދުވަހުގެ ތަރައްޤީ ގެއްލުނީއެވެ. މިއީ ވަރަށް ނުރައްކާތެރި ވާހަކައެކެވެ. އަދި ވަރަށް ބޮޑު އޮޅުވާލުމަކަށް ނޫނީ ނުވާނެއެވެ. އަދި އެތައް ބައެއްގެ އިންތިޚާބީ ޙައްޤަށް އުނިކަމެއް ލިބިދާނެ ފަދަ ކަމެކެވެ. މި ލިޔުމުގައި މައިގަނޑު ތިން ކަމަކަށް ބަލައިލަން ޤަސްދުކުރަމެވެ.
ފުރަތަމަ ކަމަކަށް، ރައްޔިތުންގެ މަޖިލީހުގެ މެންބަރުން ކުރަންޖެހޭނީ ކޮންކަމެއްތޯ؟ މެނިފެސްޓޯއެއް ބޭނުންވާނެތޯ؟
ރައްޔިތުންގެ މަޖިލިސް އަކީ ދަޢުލަތް ހިންގުމަށް ބޭނުންވާ ޤާނޫނުތައް ހެދުމާއި، އިސްލާޙްކުރަންޖެހޭ ޤާނޫނުތައް އިސްލާޙްކުރުމާއި، ސަރުކާރު ހިންގުމުގެ ބާރަށް ފާރަވެރިވެ ޖަވާބުދާރީ ކުރުމުގެ ޒިންމާ މަތިކުރެވިފައިވާ ދަޢުތަލުގެ ތިން ބާރުގެ ތެރެއިން އެއްބާރެެވެ. ވީމާ އެތަނަށް ބޭނުންވާނީ ހަމަ އެކަނި ސަރުކާރު ތަމްސީލުކުރާ ފަރާތެއް ނޫނެވެ. އެތަނަށް މުހިންމު ވާނީ ސިޔާސީ ތަޖުރިބާ އާއި ޢިލްމީ ޤާބިލްކަމާއި، ބަސްމޮށުންތެރިކަން ހުންނަ ފަރާތްތަކެވެ. އެހެނީ އެއީ ކޮންމެ ދުވަހަކު ވެސް ތަޅުމުގައި ބަހުސްކުރާ ތަނެކެވެ. އަދި އެގޮތުން ކުރެވޭ ހުރިހާ ބަހުސެއް ވެސް ޤައުމީ ޓީވީން ވަގުތުން ދުރައް ދައްކައެވެ. އެހެންކަމުން ދާއިރާގެ ޢިއްޒަތާ ކަރާމާތް ދެމެހެއްޓުމަށްޓަކައި، ރައްޔިތުން ތަމްސީލްކުރުމަށްޓަަކައި އެތަނަށް އިންތިޚާބުކުރާ ފަރާތަކީ ޢިލްމާ ފަންނާ ޤާބިލްކަމާއި ތަޖުރިބާ ހުރި ފަރާތަކަށް ވާންޖެހޭނެއެވެ. އަދި ކުރިލާ ފަރާތަކީ ސަރުކާރުންތޯ، އިދިކޮޅުންތޯ، ނޫނީ އަމިއްލަ ޙައިސިއްޔަތުންތޯ ބެލުމަކީ ކޮންމެހެން ކުރަންޖެހޭނެ ކަމެއް ނޫނެވެ. އަދި މުހިންމު ކަމެއް ވެސް ނޫނެވެ.
އަދި ރައްޔިތުންގެ މަޖިލިސްއަށް ކުރިމަތިލާ މީހަކީ ދާއިރާގެ ޢުމްރާނީ ތަރައްޤީގެ މަޝްރޫޢުތައް ހިންގާ މީހާކަމުގައި އެއްގޮތަކަށް ވެސް ވެގެން ނުވާނެއެވެ. އަދި އެފަދަ ބޮޑެތި ވަޢުުދުތައް ވުމަކީ ވެސް އޮތްކަމެއް ނޫނެވެ.
ދެވަނަ ކަމަކަށް، ރައްޔިތުން އިންތިޚާބުކުޅަ ސަރުކާރެއް 5 އަހަރުގެ ދަޢުރެއްގައި ކުރުމަށް ހުވާކުރަނީ ކޮންކަމެއް؟
ދިވެހި ހުމްހޫރިއްޔާގެ ޤާނޫނު އަސާސީގައި ވާގޮތުގެ މަތިން ކޮންމެ 5 އަހަރަކު ވެރިކަމުގެ އާދަޢުރަކަށް މީހަކު އިންތިޚާބުކުރެވެއެވެ. އަދި އެއްވެސް ރައްޔިތަކު ބާކީ ނުކޮށް އެންމެހާ ޚިދުމަތެއް ދިނުމަށް މާތް ﷲ ގަންދީ ހުވާއެއް ކުރެވެއެވެ. އެހެން ވީމާ މަޖިލިސް އިންތިޚާބާ މަތިކޮށްފައި ނުވަތަ މަޖިލިހަށް އިންތިޚާބުވާ ވަކި ޕާޓީއެއްގެ ވަކި މީހަކާ މަތިކޮށްފައި އެއްވެސް ރައްޔިތަކަށް ވިޔަސް ރަށަކަށް ވިޔަސް ދާއިރާއަކަށް ވިޔަސް ކަމެއް ނުކޮށްދީ ދޫކޮށްލުމަކީ ޤާނޫނު އަސާސީ އާއި ވަޢުދު އަހުދާ ކުރެވޭ ހުވަޔާ ޚިލާފު ޢަމަލަކަށް ނޫނީ ނުވާނެއެވެ. ވެރިކަން ކުރައްވަން މަތިކޮށްފައި ހުންނަ ފަރާތަކުން ޤާނޫނު އަސާސީއާ ޚިލާފުވެއްޖެ ނަމައީ މަޤާމު ގެއްލޭނެއެވެ. އެހެންކަމުން ވަކި މީހަކަށް ނުހޮވިއްޖެ ނަމަ ތަރައްޤީއެއް ނުލިބޭނެކަމަށް ބުނެ ފަތުރާ ވާހަކަތަކަކީ އެއްވެސް ޙަޤީޤަތެއް ނެތް ވާހަކަތަކެކެވެ. މަޖިލިސްއަށް ހޮވަން ވާނީ ރައްޔިތުން އެންމެ އިތުބާރުކުރާ އެންމެ ޤާބިލް މީހެއްކަން މިޖައްރިބެވެ.
ތިންވަނަ ކަމަކަށް، ވެރިކަމުގެ އިތުރު ދައުރެއް ކާމިޔާބުރުމަށް ބޭނުންވާ އެންމެ ބޮޑު ސިޔާސީ ބާރަކީ ކޮބާ؟
އަބަދުވެސް ވެރިކަންކުރާ ފަރާތްތަކުން އިތުރު ދަޢުރެއް ހޯދުމަށް މަސައްކަތް ކުރެއެވެ. އެހެން ނަމަވެސް އެފުރުޞަތަކީ ރައްޔިތުންނަށް ލިބޭ ތަރައްޤީ އާއި ޚިދުމަތްތައް ވަޒަންކުރުމަށް ފަހު އެމީހުން ނިންމާ ނިންމުމެކެވެ. ވީމާ އެއްވެސް ރަށެއް ބާކީ ކުރުމަކީ އިތުރު ދަޢުރެއް ލިބުމަށް ހުރަހަކަށް ވާނެކަމެކެވެ. މިސާލަކަށް ކޮންމެ 5000 ރައްޔިތަކަށް މެންބަރެއް އިންތިޚާކުރާ އުޞޫލެއް އޮންނަ އިރު، އެއް ދާއިރާ ވެސް ބާކީ ކޮށްލައިފި ނަމަ 5000 މީހުންގެ ނުރުހުން ލިބޭނެއެވެ. އަދި ދެތިން ދާއިރާއަށް އިހުމާލު ވެއްޖެ ނަމައީ 15000 މީހުންގެ ނުރުހުން ލިބޭނެއެވެ. މިއީ ރިޔާސީ އިންތިޚާބެއްގައި ކާމިޔާބުވާ ފަރާތަކަށް ތަފާތު ކުރެވޭ އެންމެ ބޮޑު ޢަދަދެއްގެ ވޯޓާ އެއްވަރު ޢަދަދެއްގެ މީހުން ނޫންތޯއެވެ. ވީމާ އެއްވެސް ސަރުކާރަކުން މަޖިލިސް މެންބަރާ މަތިކޮށްފައި ތަރައްޤީއަށް ފަރުވާކުޑަ ކުރައްވާނެކަމަށް ޤަބޫލުކުރުން އެއީ ދަތިކަމެކެވެ.
މިހުރިހާ ސަބަބުތައް މިހެން ހުރުމާއެކު ވެސް ބައެއް ފަރާތްތަކުން ސަރުކާރު ކެންޑިޑޭޓްގެ ނަމުގައި ކެމްޕެއިން ޙަރަކާތްތައް ހިންގާކަމީ ވަރަށް ދެރަކަމެކެވެ. އެހެނީ ސަރުކާރު ހިންގާ ޕާޓީގެ ކެންޑިޑޭޓަކަށް އެންމެންނަކަށް ނުވެވޭނެއެވެ. އަދި ވެވޭކަށް ނުވެސް ޖެހެއެވެ.
