ނަސީރުގެ ފޭސްބުކް އިން ފެންނަނީ ޢިލްމީ ޚަޒާނާއެކެވެ. މަޢުލޫމާތުން ފުރިގެންވާ ލިޔުންތަކެވެ. އަދި އެއީ ވެސް ހިންގުމުގެ ދާއިރާގެ ހުނަރުތައް ބަޔާންކޮށްދޭ މުހިންމު ޚިޔާލުތަކާއި، އުކުޅުތަކާއި، ފަލްސަފާތަކެވެ. އެގޮތުން މިހާތަނަށް ލިޔުއްވާފައިވާ ފާހަގަކޮށްލެވޭ 60 ސްޓޭޓަސް ކިއުންތެރިންގެ މަޢުލޫމާތައްޓަކައި ލިސްޓް ކުރަމެވެ. ކޮންސަލްޓެންސީގެ ޚިދުމަތް ފޯރުކޮށްދެއްވާ މުޙައްމަދު ނަސީރުގެ މި މަސައްކަތަކީ ޙަޤީޤަތުގައި ވެސް ޝުކުރު ޙައްޤު މަސައްކަތެކެވެ. ނަސީރުގެ ހިންގުމުގެ ބައެއް ހުނަރަުތަކުގެ އައު ނަންބަރެއް ނިކުމޭތޯ ޝައުޤުވެރިކަމާ އެކު އިންތިޒާރުގައި އަޅުގަނޑު ހުންނަމެވެ. މަތީ ތަޢުލީމުގެ މަރުޙަލާގައި ކިޔަވައިދޭ އުސްތާޛެއްގެ ޙައިސިއްޔަތުން މިއީ ވަރަށް ދެކެން ބޭނުންވާ ފަދަ ކަމެކެވެ. އަދި، މިގޮތަށް ލިޔުންކޮޅުތައް ޖަމާކޮށް، ވެބްސައިޓުގައި ޝާއިޢު ކުރުމުގެ އިޒުނަ ދެއްވިކަމަށްޓަކައި ޝުކުރު އަދާކުރަމެވެ.
ހިންގުމުގެ ބައެއް ހުނަރު -60
މަޤާމަކަށް މީހަކު ލުމަށްފަހު ޕްރޮބޭޝަންގެ މުއްދަތުގައި އޭނާ އުޅޭނޫޅޭގޮތް ނުބަލައި ދޫކޮށްނުލާށެވެ. އަދި އޭނާގެ ޕާރފޯމަންސާއި ތަނުގެ މަސައްކަތުގެ ސްޕީޑާ އެއްހަމަ ނުވާ ނަމަ ދޫކޮށްލަން ފަސްނުޖެހޭށެވެ.
ހިންގުމުގެ ބައެއް ހުނަރު -59
ސޮއި ކުރުމުގެ ކުރިން އެ ލިޔުމެއް، ވިސްނުންތެރި ކަމާއެކު، ބަލައިގެން ކިޔާށެވެ. އެހެން މީހަކުލައްވައި ކިޔައިގެން ސޮއި ނުކުރާށެވެ. ފަހެ، ދިނުމާއި ނުދިނުމާ ތަފާތުކުރަނީ އެންމެއަކުރަކުންނެވެ.
ހިންގުމުގެ ބައެއް ހުނަރު -58
މީހެއްގެ އަތުގައި މެނޭޖްމެންޓްގެ ދާއިރާތަކުން ދަސްވެނިވެ، ދެބަސްތާ ސެޓްފިކެޓް ހުއްޓަސް، ތޫނުފިލި ސިކުނޑިއަކާއި، މުރާލި މިޒާޖަކާ ހިތްހެޔޮކަން ނެތި، ފުރިހަމަ މެނޭޖަރަކަށްނުވޭނެއެވެ.
ހިންގުމުގެ ބައެއް ހުނަރު -57
އެންމެންގެ ދުލުން ބަރާބަރު މީހެކޭ ބުނެވޭ އަޑު އަހަން ބޭނުންވާ ނަމަ، ތިޔައީ މެނޭޖަރެއްގެ މަޤާމަށް އެކަށީގެންވާ މީހެއް ނޫންކަން އަމިއްލަޔަށް ގަބޫލުކޮށް، އެ ކަމާ ގާތްނުވާށެވެ.
ހިންގުމުގެ ބައެއް ހުނަރު -56
އޮފީހުގެ ޕަބްލިކް ރިލޭޝަންސް ރަނގަޅު ކުރުމަށްޓަކައި ރިސެޕްޝަން ޑެސްކްގައި ބައިންދަން ވާނީ، އެންމެ ހަރުދަނާ، ބަސްމަގުރީތި، އެހީތެރި މުވައްޒަފެވެ. އެންމެ މޭކަޕް ރީތި، އާމުވައްޒަފެއް ނޫނެވެ.
ހިންގުމުގެ ބައެއް ހުނަރު -55
އޮފީސްތެރެއިން މެނޭޖަރު އެއްގޮތަކަށްވެސް ނަގައިގެން ނުވާނެ ތިނެއްޗެއް ވެއެވެ. އެއީ، ނުޙައްޤު އޯޓީއާއި، ވެރިންގެ އޮތޯރިޓީއާއި، ބިޓުންނެވެ.
ހިންގުމުގެ ބައެއް ހުނަރު -54
މެނޭޖަރު، މުވައްޒަފުގެ ވަނަވަރު އޮޅުންފިލުވުމަށް އޭނާއާ ސުއާލުކުރާން ވާނީ، އޭނާގެ ޢިލްމާއި، ހުނަރާއި، ޕާސަނަލް ކޮލިޓީސްތަކާބެހޭގޮތުންނެވެ. ޒާތީ ކަންތައްތަކާ ބެހޭގޮތަކުން ނޫނެވެ.
ހިންގުމުގެ ބައެއް ހުނަރު -53
މެނޭޖަރަށް އެނގިހުރެ، ކުޑަކަމެކޭ ހީކޮށް، އެންމެ ކަމެއް ނުގަވައިދުން ހިނގަން ދޫކޮށްލި ނަމަވެސް، އެއާ ތަބާވެގެން އެއަށްވުރެ ބޮޑު އެއްހާސް ކަންތައް، އެ ގޮތަށް ދޫކޮށްލަން ނުޖެހި ނުދާނެ އެވެ.
ހިންގުމުގެ ބައެއް ހުނަރު -52
ހިންގުންތެރިކަމުގައި މުއާޞަލާތުގެ ދައުރުގެ މުހިންމުކަމާމެދު ޝައްކު ކުރާ މީހާ، ދަންނާށެވެ. ފަހެ، ބޮޑެތި ހަނގުރާމަތައް ފަށްޓަނީވެސް އަދި ހުއްޓަނީ ވެސް، ބަޑިއަކުން ބޮމަކުން ނޫނެވެ. ވާހަކައިންނެވެ.
ހިންގުމުގެ ބައެއް ހުނަރު -51
ގަޑިއަށް ފަރުވާތެރިވެ އެހެން މީހުނަށް އެ ކަމުގައި ނަމޫނާ ދެއްކުމަކީ، މޮޅު ހިންގުންތެރިންގެ ކިބައިން ފެންނަ، އެންމެ އަސާސީ އެއް ސިފަ އެވެ.
ހިންގުމުގެ ބައެއް ހުނަރު -50
ބޯޑްމީޓިންގ އަށް ނުވަތަ ކައުސިލްގެ ރަސްމީ ބައްދަލުވުމަށް ވަނުމުގެ ކުރިން، އެޖެންޑާގައި ހުރި ކަންތައްތަކާމެދު މެމްބަރުންގެ ޚިޔާލުތައް ހުރިނެތްގޮތް ދެނެގަނެ އެއަށް އަހުލުވެރި ވާށެވެ.
ހިންގުމުގެ ބައެއް ހުނަރު -49
އިޖްތިމާޢީ ނުވަތަ އިޤްތިޞާދީ އަރުތައެއް ހާޞިލު ކުޅައުމުގެ ޕްލޭނަކާ ނުލައި، ހަމައެކަނި ފޮޓޯނަގައި މީސްމީޑިޔާއަށް ލުމަށް ހިންގާ ކަންކަމުގެ ޚަރަދު ލިޔަން ވާނީ އިސްރާފުގެހިސާބު ލިޔާ ފޮތްތަކުގައެވެ.
ހިންގުމުގެ ބައެއް ހުނަރު -48
އޮފީސް މާޙައުލުގެ ބަޒްވޯޑަކީ، ނުވަތަ އެންމެ ޢާންމުކޮށް ދެކެވޭ ވާހަކައަކީ ޑެޑްލައިން ނުވަތަ ސުންގަޑީގެ ވާހަކަ ކަމަށް ވާނަމަ، އެއީ ނަމޫނާއޮފީހެއް ކަމުގައި ފާހަގަކުރާށެވެ.
ހިންގުމުގެ ބައެއް ހުނަރު -47
ހަނދާނުގެ މައްޗަށް އިތުބާރުކޮށް، ނޯޓްކުރުމަކާ ނުލައި ކަންކަން ދޫކޮށްލުމަކީ، މެނޭޖަރަކު ކޮށްގެން ވާނޭ ކަމެއް ނޫނެވެ. ފޮތާއި ގަލަން ނުވަތަ އެ މާނައިގައި ހިމެނޭ ތަކެއްޗަކީ ހިންގުމުގެ މުހިންމު ބަހާތަކެވެ.
ހިންގުމުގެ ބައެއް ހުނަރު -46
މެނޭޖަރަކީ، ދީލިކަޑަވާ ނުވަތަ ނެގިމަޑުވާ މީހަކަށް ވެގެން ނުވާނެ އެވެ. އޭނާ ވާންޖެހޭނީ ހަރުދަނާ، އެސަރޓިވް މީހަކަށެވެ. އެއީ އޭނާގެ ދަށުގައި އީމާންތެރިންނާއި މުނާފިޤުން ވެސް ތިބޭނެތީ އެވެ.
ހިންގުމުގެ ބައެއް ހުނަރު -45
ކަންކަމާމެދު މަޝްވަރާ ކުރާއިރު، “ނު” މީހާ އާއި، އިދި މީހާއަށް ވެސް ފުރުޞަތު ދީ، އެމީހުން ފާހަގަކުރާ ނުކުތާތައް ކަނުލައި އަޑުއަހައި، އޭގައި ހުރި އޮއްޓަރަކާމެދުވެސް ފުންކޮށް ވިސްނާށެވެ.
ހިންގުމުގެ ބައެއް ހުނަރު -44
ރުޅިއާއި، ހިތްހަމަނުޖެހުމުގެ ވަގުތު ތަކުގައި މުވައްޒަފުންނާ ކުރިމަތިލާނަމަ، ހިތާމަވެރި ކިތަންމެ ކަންތައް ތަކެއް ކުރިމަތި ވެދާނެ އެވެ. ޖަޒުބާތީ ޙާލަތެއްގައިހުރެ އެއްވެސް ނިންމުމެއް ނުނިންމާށެވެ.
ހިންގުމުގެ ބައެއް ހުނަރު -43
ސައިކޮޓަރީގައި ތިބި މުވައްޒަފުން ދައްކަނީ، މަސައްކަތާގުޅޭ ވާހަކައެއް ނަމަ، އެ ސައިގެ ބިލް ކަނޑައިދޭށެވެ. މީސްމީހުންގެ ވާހަކަ ނަމަ، އެތަނުގެ އިސްމީހާ ބޭރުތެރޭގެ މަސައްކަތަކަށް ފޮނުވާލާށެވެ.
ހިންގުމުގެ ބައެއް ހުނަރު -42
ދުވަހުގެ ފުރަތަމަ ފެނިލުމުގައި މެނޭޖަރު ވެލާ ހިނިތުން ވުމަކީ، މުޅި ދުވަހުގެ މަސައްކަތުގެ މޯޓިވޭޝަނަށްޓަކައި މުވައްޒަފުންނަށް ދެވޭ ފުރަތަމަ ޑޯޒްކަން ހަނދާން ބަހައްޓާށެވެ.
ހިންގުމުގެ ބައެއް ހުނަރު -41
މުވައްޒަފުންނަށް ކަންކަން ބުނެދިނުމަށް ފޫހި ނުވާށެވެ. ހަމައެކަނި ޕްރޯއެކްޓިވް/ރިއެކްޓިވް މުވައްޒަފަކަށް ރަނގަޅަށް އުނގަންނައިދެވުނަސް އޭނާގެ ފުށުން، ހީނުކުރާހައި ފައިދާ އިތުރުވާނެއެވެ.
ހިންގުމުގެ ބައެއް ހުނަރު -40
އަހަރީ ބަޖެޓް ފިޔައި އެހެން ހުރިހައި ޕްލޭންތަކަކީ ޚިޔާލީ ތަކެއްޗެވެ. ބަޖެޓްގައި ރިކަރެންޓް ގިނަވުން ދޭހަކޮށްދެނީ ކުރިއެރުން ލަސްވާނެ ކަމެވެ. ކެޕިޓަލް ޚަރަދު ގިނަވުން ދޭހަކޮށްދެނީ އަވަސް ކުރިއެރުމެވެ.
ހިންގުމުގެ ބައެއް ހުނަރު -39
އަހަރީ ޗުއްޓީ ނުނަގަން މުވައްޒަފަކު ގަސްދު ކުރާނަމަ، އޭނާ ކުރަމުންގެންދާމަސައްކަތާއި އަދާކުރާ ޒިންމާތައް ވަކި މުއްދަތަށް އެހެން މުވައްޒަފަކާ ހަވާލުކޮށް، އޭނާ ޗުއްޓީއަށް ދާން ބޭނުން ނުވާ ސަބަބުތައް ހޯދާށެވެ.
ހިންގުމުގެ ބައެއް ހުނަރު -38
މުވައްޒަފެއްގެ ބުރަދަން މިނެކިރާނީ، އޭނާ ދައްކާ ވާހަކައިގެ ފޮނިމީރު ކަމަކަށް ނޫނެވެ. އޭނާގެ ޢަމަލުން ނެރެދޭ ނަތީޖާއަށެވެ. “ކަތާ ހޮނދަ، ވެޑެނަރަކަ” މީހުން ނުހަނު ގިނަކަން ދަންނާށެވެ.
ހިންގުމުގެ ބައެއް ހުނަރު -37
ހިންގުންތެރި މެނޭޖަރުންގެ ދާދި ގާތުގައި އެ މީހުންގެ ޑައިރީ ފޮތް ގެންގުޅެ އެވެ. އަދި ފޫހިކަމެއް ނެތި އެ މީހުންގެ ފޯނުތަކުގެ ޓުޑޫ ލިސްޓް އަދާހަމަ ކުރަމުން ގެންދެ އެވެ.
ހިންގުމުގެ ބައެއް ހުނަރު -36
ދައުލަތުގެ އިދާރާއެއްގެ ސިޔާސީ މީހުން އިދާރީ ކަންކަމަށް ވަދެ ނުވަތަ އިދާރީ މީހުން ސިޔާސީ ކަންކަމަށް ވަދެ މައްސުނި ވެއްޖެނަމަ، އެތަނެއް ރަނގަޅަށް ހިންގާވާހަކަ ޖެހޭނީ ހުއްޓާލާށެވެ.
ހިންގުމުގެ ބައެއް ހުނަރު -35
މެނޭޖްމެންޓަކީ، ދަސްކުރަން ފަސޭހަ ޢިލްމެކެވެ. ކުރަން އުނދަގޫ މަސައްކަތެކެވެ. ކަމެއް ހިންގުމޭ ބުނާ ކޮންމެ ފަހަރަކު ނުސީދާކޮށް އެ ދެކެވެނީ އެތަކެއް މީހުން ލައްވައި، އެތައް ކަމެއް ކުރުވާ ވާހަކަ އެވެ.
ހިންގުމުގެ ބައެއް ހުނަރު -34
އެޑްމިނިސްޓްރޭޝަން އާއި މެނޭޖްމެންޓަކީ އެއް ކަމެއް ކުރާ ދެ ގޮތަކަށް ކިޔާފައިވާ ދެ ނަމެކެވެ. މީގެ އެންމެ ފަސޭހަ އެއް މިސާލަކީ، ބަލައިގެން ޚުޠުބާ ކިޔުމާއި ނުބަލައި ޚުޠުބާ ކިޔުމެވެ.
ހިންގުމުގެ ބައެއް ހުނަރު -33
މެނޭޖަރަކީ ނަމޫނާއަކަށް ވާށެވެ! ބަހާއި ޢަމަލު އެއްގޮތް ކުރާށެވެ! އޭރުން ތިމާގެ ރިފަރެންޓް ޕަވަރ އިތުރަށް ވަރުގަދަ ވާނެއެވެ. މުދިންކާޅު ގުއި ކައިފިނަމަ އެހެން ހުރިހައި ކާޅަކަށް ގުއި ހުއްދަވީއެވެ.
ހިންގުމުގެ ބައެއް ހުނަރު -32
އޯގަނައިޒޭޝަނަށް ވިހި،ތިރީސް އަހަރު ޚިދްމަތް ކޮށްފަ ހުރި މުވައްޒަފަކާމެދު މައްސަލައެއް ޖެހިގެން އެކަން ބަލާއިރު، އެ ދިގު މުއްދަތުގައި މިފަދަ ގޯހެއް އޭނާ ހަދާފައި ނެތީ ކީއްވެތޯ ވެސް ބަލަންވާނެ އެވެ.
ހިންގުމުގެ ބައެއް ހުނަރު -31
މެނޭޖަރުންނަކީ، ސިޔާސީމީހުންހެން އަމިއްލަ ސަޕޯޓް ބޭސް ފުޅާކުރުމަށް މަސައްކަތް ކުރަންޖެހޭ ބައެއް ނޫނެވެ. އެ މީހުންގެ ޒިންމާއަކީ، އުޞޫލުތައް ދެމެހެއްޓުމާއި، ސިސްޓަމް މެއިންޓެއިން ކުރުމެވެ.
ހިންގުމުގެ ބައެއް ހުނަރު-30
މެނޭޖަރަކީ، ހަތަރުފަރާތުން ލަނބުރާންޖަހައިގެން ނޫނީ ކޮޅަށް ނުހުރެވޭ މީހަކަށް ވެގެން ނުވާނެއެވެ. އޭނާ ވާން ޖެހޭނީ، ބުނަންޖެހޭ ކޮންމެ އެއްޗެއް ބުނެވޭ ކުރަންޖެހޭ ކޮންމެ ކަމެއް ކުރެވޭ މީހަކަށެވެ.
ހިންގުމުގެ ބައެއް ހުނަރު -29
މެނޭޖްމެންޓްގެ ތިއަރީ ތަކަކީ ނެތް އެއްޗަކަށް ނުވަތަ ބާޠިލު އެއްޗަކަށް ހަދައިގެން ނުވާނެއެވެ. ނަމަވެސް، ތިއަރީއަކީ ހުރިހާ ތަނެއްގައި އެއްގޮތަކަށް އޮންނާނެ އެއްޗެއް ނޫންކަން ވެސް ދަންނަންވާނެއެވެ.
ހިންގުމުގެ ބައެއް ހުނަރު -28
އޯގަނައިޒޭޝަންތައް ހިންގުމުގައި އެންމެ ބޮޑެތި ގޮންޖެހުންތައް ކުރިމަތި ވަނީ، އެ ތަންތަނުގެ މެނޭޖްމަންޓުގެ ކޮންޓްރޯލިންގ ފަންކްޝަން ދޯހަޅިވެ އިސްލާހީ ފިޔަވަޅު އެޅުމަށް ފަސްޖެހުމުންނެވެ.
ހިންގުމުގެ ބައެއް ހުނަރު -27
މެނޭޖްމެންޓްގެ މި ޒަމާނުގެ ޢިލްމުގައި މުވައްޒަފުން ހިމަނާފައިވަނީ އިންސާނީ ރައުސުލްމާލުގެ ގޮތުގަ އެވެ. ވީމާ، ވެރިންނާއި މެނޭޖަރުން ވެސް މުވައްޒަފުން ދެކެން ވާނީ އެ ނަޒަރިއްޔާއިންނެވެ.
ހިންގުމުގެ ބައެއް ހުނަރު -26
އެއްވެސް ފަރާތަކަށް، އެއްވެސް ވަޢުދެއް ވާން ވާނީ، އެ ވަޢުދެއް ފުއްދުމަށް ވާންޖެހޭ އެންމެހައި ތައްޔާރީތައް ވެސް ނިމުމުންނެވެ. މެނޭޖަރެއްގެ މުޅި ކެރިއަރު ބިނާވެފައި އޮންނަނީ އޭނާގެ އިތުބާރުގެ މައްޗަށެވެ.
ހިންގުމުގެ ބައެއް ހުނަރު -25
ރަނގަޅުވާހަކަ ދައްކަނީ ރަނގަޅުމީހުން އެކަންޏެއް ނޫނެވެ. ވީމާ، ރަނގަޅުނޫން މުވައްޒަފުންގެ ވާހަކަ ވެސް ކަނުލައި އަޑުއަހަން ވާނެ އެވެ.
ހިންގުމުގެ ބައެއް ހުނަރު -24
މީހެއްގެ ހުރި ޢިލްމަކާއި ހުނަރަކީ، އޭގެ އެދެވޭ ބޭނުމެއް ހިފައިފުމަށް ދާންދެން، ނެތް އެއްޗެއް ފަދައެވެ. އެހެންކަމުން، ޢިލްމާއި ހުނަރު ލިބިދޭން ވާނީ އޭގެ ބޭނުންހިފާނޭ މީހުންނަށެވެ.
ހިންގުމުގެ ބައެއް ހުނަރު -23
ހިސާބު ކިތާބު ނުބަލައި ކަމެއް ކުރުމެކޭ، ސަމުގާއެއް، ޖީޕީއެސް އެއް ނެތި ހުވަދޫކަނޑު ހުރަސް ކުރުމެކޭ ތަފާތެއް ނެތެވެ. ނަތީޖާ އަކަށް ވާނީ، ވާއެއް ނުވާއެއް ނޭގި، ދެވޭނުދެވޭ ތަނެއް ނޭގި ގެއްލި ނިމިދިއުމެވެ.
ހިންގުމުގެ ބައެއް ހުނަރު -22
މޮޅު އާލާތްތަކާއި، އަގުބޮޑު ތަކެތިން އޮފީސް ތެރެ ފަޅުފިލުވުމަށްވުރެ، ޢިލްމާއި ހުނަރުން މުވައްޒަފުންގެ ސިކުނޑިތައް މުއްސަނދި ކުރުން މާ ރަނގަޅު ވާނެ އެވެ. ކަން ކުރަނީ އާލާތްތަކެއް ނޫނެވެ. މީހުންނެވެ.
ހިންގުމުގެ ބައެއް ހުނަރު -21
ކާމްޗޯރު ނުވާށެވެ. މާނައަކީ، ޚިދްމަތް ދިނުމުގައި މަކަރާއި ހީލަތްހަދައި އޮޅުވައި ނުލާށެވެ. ތިބާއަށް الله ނުފެނުނަސް ތިބާގެ ކޮންމެ ޢަމަލެއް الله ބައްލަވައިވޮޑިގެން ވާނެކަން ދަނެ، ބިރުވެތި ވާށެވެ.
ހިންގުމުގެ ބައެއް ހުނަރު -20
ޢަމަލީގޮތުން މަސައްކަތް ކުރަމުންދާ މުވައްޒަފަކު އެ ކަންކުރާ ގޮތާމެދު ފާޑުކިޔަން ވާނީ ނުވަތަ އެ ނޫން ގޮތަކަށް ކުރަން އަންގަންވާނީ، އޭނާ އުނިކޮށް ކުރާކަންކަން ރަނގަޅަށް ފާހަގަ ކުރުމަށްފަހުގަ އެވެ.
ހިންގުމުގެ ބައެއް ހުނަރު -19
ދެމެހެއްޓެނިވި ގޮތެއްގައި ކަމެއް ހިންގަން ބޭނުން ވާ ނަމަ، އެ ކަމަކާ ގުޅިފައިވާ އެންމެހައި ކަންތައްތައް، ޤާނޫންތަކާއި ގަވައިދުތަކާ އެއްގޮތަށް ގެންދާށެވެ.
ހިންގުމުގެ ބައެއް ހުނަރު -18
މުވައްޒަފުންގެ ޙައްޤުތަކަށް ރައްކާތެރި ވާށެވެ. އިޚްލާޞްތެރި ޚިދްމަތެއް މުވައްޒަފުންގެ ފަރާތުން ލިބޭނީ އޭރުންނެވެ.
ހިންގުމުގެ ބައެއް ހުނަރު -17
މެނޭޖަރަކީ އައިޓީގެ އެކްސްޕާޓަކަށް ވުން ލާޒިމެއް ނޫނެވެ. ނަމަވެސް ސްމާޓްފޯނާއި، މީސްމީޑިއާގެ މަންސަތަކާއި ، އޭއައި އާއި، އެމްއެސް އޮފީސް ފަދަ ތަކެއްޗަށް އަހުލުވެރި މީހަކަށް އޭނާ ވާންޖެހޭނެ އެވެ.
ހިންގުމުގެ ބައެއް ހުނަރު -16
ސްޓްރެޓެޖިކް މެނޭޖަރުންނަކީ، ސައިންސްވެރިން ފަދަ ވިޜަނަރީ ލީޑަރުންނެވެ. އެ މީހުން ކޮންސެޕްޗުއަލައިޒް ކުރާ ކަންތައްތައް ވިޝުއަލައިޒްކޮށް މުވައްޒަފުންނަށް ދައްކާނެއެވެ. އަދި ޓްރާންސްފޯމޭޝަނަލް ބަދަލުތައް ގެންނާނެ އެވެ.
ހިންގުމުގެ ބައެއް ހުނަރު -15
ރަނގަޅު މެނޭޖަރަކީ، އެއް ސެކްޓަރެއްގައި ދަތުރުކުރާ މޮޅު ޕައިލޮޓެއް ކަހަލަ މީހެކެވެ. އޭނާގެ ޒިންމާގެ ދަށުގައިވާ ކަންކަމަށް އެއްވެސް ބުރުލެއް އެރިޔަނުދީ ފުރިހަމަޔަށް ހިންގައި ބަލަހައްޓައި ޖަވާބުދާރީވާނެ އެވެ. ނަމަވެސް އިތުރުކަމަކާ އޭނައެއް ނުވިސްނާނެ އެވެ.
ހިންގުމުގެ ބައެއް ހުނަރު -14
މުވައްޒަފުން މަސައްކަތް ނުކުރާތީ ކަންކަން ނުނިމޭވާހަކަ ދައްކާ މެނޭޖަރުން އެ މަޤާމުތަކުން ވަކިކުރާށެވެ. ޙަޤީޤީ މެނޭޖަރުންނާއެކު މުވައްޒަފުން މަސައްކަތް ކުރާނީ އަމިއްލަޔަށް އެދިގެންނެވެ.
ހިންގުމުގެ ބައެއް ހުނަރު -13
ތެދުވެރި މުވައްޒަފުން ސްޓޮކްގެ ތަޅުދަނޑި ދެކެ ބިރުގަންނާނެ އެވެ. އެ ނުލިބިގެންއުޅޭ މީހުންނާމެދު ފަރުވާތެރިވާށެވެ. ވެރިމީހާގެ ޖީބަށް ތަޅުދަނޑިފަތި ލައިގެން އުޅޭނަމަ ބަލާށެވެ! އެއީ ވަގެކެވެ.
ހިންގުމުގެ ބައެއް ހުނަރު -12
ސަނާކިޔާ މީހުންނާމެދު، ވެރިން ސަމާލުވާން ޖެހޭނެ އެވެ. އެހެން މީހުން ނުދައްކާ ވާހަކަތަކެއް، ވަކި މީހަކު ނުވަތަ ބަޔަކު މި ދައްކަނީ ކީއްވެތޯއާއި، ވެދުން ކުރުމުގެ ފަހަތުގައިވާ އެދުންތަކަކީ ކޮބައިތޯ ބަލާށެވެ.
ހިންގުމުގެ ބައެއް ހުނަރު -11
ދެކޮޅުޖެހޭގޮތަށް ކުރެވެން ނެތްކަންކަން ނުކޮށް ދޫކޮށްލާށެވެ. މިހެނީ، އެ ފަދަ ކަމަކަށް ކިތަންމެ ބޮޑު ޚަރަދެއް ކޮށް، ކިތަންމެ ވަރުބައްޔެއް ވިޔަސް ލިބޭނީ މީހުންގެ ނަފްރަތާއި މަލާމާތުން ލިބޭ ހިތްދަތިކަމެވެ.
ހިންގުމުގެ ބައެއް ހުނަރު -10
ރަސްމީ މާޙައުލުގައި ވީހައިވެސް ގިނައިން ދައްކާންވީ އެކި ކަންކަމުގެ ވާހަކަ އެވެ. ހަމަ އެއްގޮތަކަށް ވެސް ނުދައްކަންވީ އެކި މީސްމީހުންގެ ވާހަކަ އެވެ.
ހިންގުމުގެ ބައެއް ހުނަރު -9
ވެރިމީހާގެ ކަންފަތްބުޑުގައި ވަކި މުވައްޒަފަކު ތާއަބަދު ހޭކެން ފުރުސަތު ދީފިނަމަ އޭނާ ވާނީ އެ ތަން ހަލާކު ކުރާނޭ ކަތުރުފަންޏަށެވެ. މުވައްޒަފުންނާ ވެރިންގެ ގުޅުންތައް ބާއްވަން ވާނީ ރަސްމީ ތަރުތީބުންނެވެ.
ހިންގުމުގެ ބައެއް ހުނަރު -8
ޢިލްމާއި ހުނަރު ކިތަން ވަރަކަށް ހުއްޓަސް ވަޒީފާ ދޭން ވާނީ ތިމާއަށް ކޮންޓްރޯލްކޮށްގެން ގެންގުޅެވޭނެ މީހުންނަށެވެ. އެހެން ނޫންނަމަ، އެ އިސްކުރެވެނީ ތިމާއަށް ކޮންމެފަދަ އަމުރެއް ވެސްފާނޭ ވެރިންނެވެ.
ހިންގުމުގެ ބައެއް ހުނަރު -7
ހިންގުމުގެ ނިޒާމުގައި އަބަދުވެސް ދެ ކަމެއް ފެއިލް ވިޔަނުދީ ދަމަހައްޓަން ވާނެ އެވެ. އެއީ ލައިންސް އޮފް ކޮމިއުނިކޭޝަން (މުއާޞަލާތުހިނގާ މަގުތައް) އާއި، ޗެއިން އޮފް ކޮމާންޑް (އަމުރުވެރިކަމުގެ ހަރުފަތް) އެވެ.
ހިންގުމުގެ ބައެއް ހުނަރު -6
ސުޕަވައިޒު ކުރަންޖެހިއްޖެހިނދެއްގައި މެނުވީ، އިސްވެރިން ވަޑައިގެން ރޫޓީން ޕްރޮސެސިންގ ހިނގާ ތަންތާނގައާއި، އޮޕަރޭޝަނަލް ސައިޓްތަކުގައި ގިނަ ވަގުތު ތިބުމަކީ، މުވައްޒަފުންނަށް ދަތިވާނެ ކަމެކެވެ.
ހިންގުމުގެ ބައެއް ހުނަރު -5
ލައިން މެނޭޖަރުންނާއި ސުޕަވައިޒަރުން ގެނެސްގެން ގިނަ ބައްދަލުވުންތައް ބާއްވައި، އެ ކަމުގައި މާގިނަ ވަގުތު ހޭދަކުރަން ޖެހުމަކީ، ތަނުގެ މަސައްކަތްތައް ލަސްވެ އުފެއްދުންތެރިކަން ދަށްވާނެ ކަމެކެވެ.
ހިންގުމުގެ ބައެއް ހުނަރު-4
މަށަކަށް ޕްލޭނެއް ބޭނުމެއް ނޫނޭ، މަ ކުރާނީ ކަންކަމޭ، ކިޔާފައި ޕްލޭނަކާ ނުލައިކަމަށް ހީކޮށް ކަންކުރާމީހާވެސް އެ ތަންފީޒު ކުރަނީ ސްޓެންޑަރޑް ޕްލޭނެކެވެ. އެއީ އޭނާ ފެއިލްވުމުގެ ޕްލޭނެވެ.
ހިންގުމުގެ ބައެއް ހުނަރު -3
އެކަކުލައްވައި ހުރިހައި ކަމެއް ކުރުވަން އުޅުމާއި، އެންމެން އެއްކޮށްގެން އެއްކަމެއް ކުރަން އުޅުމާއި، މި ދެކަމަކީ އެއްވެސް ހާލެއްގައި ކޮށްގެންވާނޭ ކަންކަމެއް ނޫނެވެ.
ހިންގުމުގެ ބައެއް ހުނަރު-2
އަގުހެޔޮކޮށް އެއްޗެއް ހޯދަން ވެއްޖެނަމަ ދާނީ ބޮޑު ފިހާރަ އަށެވެ. ނަމަވެސް އެއްޗެއް އަވަހަށް ހޯދަންވެއްޖެ ނަމަ، ދާނީ ކުޑަ ފިހާރައަށެވެ. އެއީ ބޮޑު ފިހާރަަށްވުރެ އަވަހަށް ކުޑަ ފިހާރައިން ޚިދްމަތް ލިބޭނެތީ އެވެ.
ހިންގުމުގެ ބައެއް ހުނަރު -1
ކަސްޓަމަރުގެ ބޭނުން ވަރަށް ރަނގަޅަށް ދެނެގަންނާށެވެ. އެއަށްފަހު ޖަވާބު ދޭށެވެ. މިސާލު: ދޮޅުއިންޗީގެ އާދައިގެ ދަގަނޑު ހޮޅި ދެއްތޯ؟ ލިބެން އެބަހުރި. އަގަކީ ޖީއެސްޓީ އާ އެކު -/425 ރުފިޔާ.
